राजविराज : नेपाली काँग्रेसका उपसभापति विमलेन्द्र निधिले प्रतिनिधि सभाको गठनले मात्र देशलाई निकास दिन सक्ने बताएका छन् ।
उनले सर्वोच्च अदालतबाट प्रतिनिधि सभाको पुनस्र्थापना भए वा चुनावबाट भए प्रतिनिधि सभाको गठनबाट मात्रै देशले निकास पाउने बताए । ‘अहिले देशमा जुन रोग लागेको छ त्यसको उपचार संसद पुनस्र्थापना वा संसदको गठन मात्रै हो’ उनले भने, ‘संसदको पुनस्र्थापना अदालतको हात छ र संसदको गठन जनताको हातमा छ ।’
राजविराजको राज रंगशालामा सोमबार प्रधानमन्त्री केपी ओलीको असंवैधानिक तरिकाले प्रतिनिधि सभा विघट्नको विरुद्धमा नेपाली काँग्रेस सप्तरीले आयोजना गरेको जिल्ला स्तरीय विरोध सभा लाई सम्बोधन गर्दे उपसभापति निधिले आन्दोलन र निर्वाचन दुवैका लागि कार्यकर्तालाई तयार भएर बस्न निर्देशन दिए ।
उनले सर्वोच्च अदालतबाट संसद पुनस्र्थापना नभए अर्को विकल्प निर्वाचन भएको बताउँदै नेपाली काँग्रेस जनतामा जानबाट कहिले नडराएको स्पष्ट पारे । देशमा प्रतिनिधि सभाको निर्वाचन हुने कि नहुने बारे शंका व्यक्त गर्दे उनले भने ‘कहीं यस्तो नहोस् कि संसदको पुनस्र्थापना पनि हुँदैन र निर्वाचन पनि हुँदैन् ।’
उपसभापति निधिले कम्युनिष्टलाई जनताले बहुमत दिनु नै गलत भएको उल्लेख गर्दे विगतमा भएको गल्तीलाई सच्याउनका लागि आउने चुनावमा काँग्रेस पार्टीलाई जिताउन जनता संग आग्रह गरे । प्रधानमन्त्री केपी ओली सरकारको अनाडी ड्राईभर भएका कारण संसद असंवैधानि तरिकाबाट संसद विघट्न गरेको उनले तर्क गरे । ‘गाडी जति सुकै राम्रो भएपनि ड्राईभर राम्रो भए मात्रै गाडी चल्छ, अनाडी ड्राईभरले त दुर्घट्ना नै गराउँछ’ उनले भने ।
जनता समाजवादी पार्टी प्रति लक्षित गर्दै निधिले मधशवादी कुनै दल नै नभएको बताए । मधेशीको नाममा दल बनाएर नाम परिवर्तन गर्दै हिड्ने दलहरु मधेशीका लागि केही गर्न सकेको आरोप लगाए । काँग्रेस विना मधेश हुनै नसक्ने तर्क राख्दै उनले काँग्रेसले मात्रै मधेश र मधेशीको हित गर्न सक्ने जिकिर गरे ।
जिल्ला सभापति दिनेश यादवको अध्यक्षतामा आयोजित विरोध सभामा नेपाली काँग्रेसका क्षेत्रिय सभापतिहरु, नगर सभापतिहरु लगायतका नेताहरुले संसद विघट्नको विरोधमा आफ्नो विचार व्यक्त गरे । विरोध सभा अघि काँग्रेका नेता तथा कार्यकर्ता विरोध जुलुसमा सहभागी हुँदै राजविराजको विभिन्न भागको परिक्रमा गरेका थिए ।
यसैबीच जनता समाजवादी पार्टी परित्याग गरेका ५५ जना नेपाली काँग्रेसमा प्रवेश गरेको नेपाली काँग्रेस सप्तरीले जनाएको छ । उनीहरुलाई पार्टी उपसभापति विमलेन्द्र निधिले टिका तथा फूलमाला लगाएर पार्टी प्रवेश गराएका हुन् ।
तपाईको प्रतिक्रिया !!