झा दम्पत्तिको अवस्था अझै अज्ञात

महोत्तरी । गत सोमवार घरबाटै वेपत्ता भएका महोत्तरीको पिपराका एक वृद्ध झा दम्पतिको अवस्था अझै अज्ञात छ । पिपरा गाउँपालिका–५ सहोडवास्थित घरमै सुति रहेका ६६ बर्षीय मुसाफिर झा र उनकी पत्नी ६० बर्षीया गीतादेवी सुतिरहेकै ठाउँबाट हराएका हुन् । उनीहरूको अपहरण भएको हुन सक्ने आशंका गरिएको भए पनि प्रहरीको अनुसन्धानबाट हालसम्म उनीहरूको अवस्थाका बारेमा केही पत्ता लाग्न सकेको छैन । उनीहरूको अपरहण भएको थाहा पाए देखि नै प्रहरीले रातदिन नभनी उनीहरूको खोजविन गरि रहेको छ ।

‘अहिलेसम्म आर्थिक, सामाजिक, पारिवारिक पक्षलाई हेरेर अनुसन्धान गरेका छौं’ प्रदेश २ का प्रहरी प्रमुख डिआईजी धिरजप्रताप सिंहले भने, ‘घटनामा जग्गा विवाद पनि हुन सक्छ । हामी सबै पक्षलाई हेरेर अनुसन्धान गरिरहेका छौं ।’ अनुसन्धान गर्ने क्रममा आएका कतिपय कुरा औपचारिक रुपमा भन्न नमिल्ने पनि उनले बताए । उनीहरूको खोजीका लागि प्रहरीले तालिमप्राप्त प्रहरी समेत खटाएको छ । ढिलो चाँडो प्रहरीले उनीहरूको खोजीगरी सत्यतथ्य बाहिर ल्याउने प्रहरीले बताएको छ । मालपोत कार्यालयका अवकाश प्राप्त कर्मचारी झा आफ्ना श्रीमती, बुहारी र नातिनातिनासँग बस्दै आएका थिए । उनी लोहारपट्टी नगरपालिकाको मोही जग्गामा साक्षी बसेका थिए । सोही कारण उनीहरूको अपहरण भएको हुन सक्ने गाउँलेले पनि आशंका गरेका छन्।