मनोज यादव/सर्लाही,धर्मेन्द्र कुमार साह/रौतहट: प्रदेश २ को दुई स्थानमा बालविवाह अन्त्यका लागि सामाजिक अभियन्ता, धार्मिक अगुवा तथा स्थानीय सरकारबीच सम्वाद कार्यक्रम सम्पन्न भएको छ । राष्ट्रिय अन्तर धार्मिक सञ्जाल ललितपुरको आयोजना तथा वल्र्ड भिजनको सहयोगमा प्रदेश २ को सर्लाहीको मलंगवा र रौतहटको गौर नगरपालिकामा सम्वाद कार्यक्रम सम्पन्न भएको हो।
सर्लाहीमा भएको कार्यक्रममा सहभागी नागरिक समाज सर्लाहीका महासचिव शिवचन्द्र चौधरीले बालविवाह, दहेज(दाइजो) प्रथा, छुवाछुत जस्ता कु–प्रथा अन्त्यका लागि तराई मधेसका जिल्लामा विशेष जनचेतनामूलक अभियानहरू संचालन गर्न‘ पर्नेमा जोड दिए । बालविवाह विरुद्ध गाउँ, टोल र माध्यमिक विद्यालयमा विशेष कार्यक्रमहरू गरि अभियानकै रुपमा संचालन गर्न उनले सुझाव दिए । बाल विवाह तथा दहेज(दाइजो) प्रथा न्यूनीकरणमा धार्मिक गुरुहरूको पनि विशेष भुमिका भएकोले यसका लागि अन्तर धार्मिक सञ्जाल मार्फत् सर्लाही जिल्ला लगायत तराई मधेशका अन्य जिल्लाहरूमा विशेष कार्यक्रम संचालन गरिने अन्तर धार्मिक सञ्जालका राष्ट्रिय अध्यक्ष हर्ष थापाले बताए ।
कार्यक्रममा आफ्नो भनाइ राख्दै मलंगवा नगरपालिका मेयर निरसल साहले ‘बेटी बचाउ बेटी पढाउ’ अभियान स्थानीय स्तरमा प्रभावकारी नभएकोमा दुःख व्यक्त गरेका छन्। यस अभियानलाई आउने दिनमा अझ प्रभावकारी रुपमा अगाडि बढाएर सफल पार्न नगरपालिकाको तर्फबाट भरपुर सहयोग गर्ने कार्यक्रम मार्फत मेयर साहले प्रतिबद्धता व्यक्त गरे। राष्ट्रिय अन्तर धार्मिक सञ्जाल जिल्ला अध्यक्ष डा. अब्दुल रहिम मिकरानीको अध्यक्षता तथा अन्तर धार्मिक सञ्जाल ललितपुरका केन्द्रीय अध्यक्ष हर्ष थापाको प्रमुख आतिथ्यतामा आयोजना भएको कार्यक्रममा मेयर साह, उपमेयर शान्ति सबनम मिकरानी, नागरिक समाज सर्लाहीका महासचिव चौधरी, नेपाल शिक्षक संघ सर्लाहीका जिल्ला अध्यक्ष कौशल किशोर यादव, जेष्ठ नागरिक लालकृष्ण झा, पुर्व प्रअ महेन्द्र प्रसाद कर्ण, अच्युतानन्द झा, अजय कुमार चौधरी लगायत विभिन्न समुदायका धार्मिक गुरु, वडाअध्यक्षहरूलगायतको सहभागिता रहेको थियो।
उता रौतहटको गौर स्थित होटेल सिया पैलेसमा सम्पन्न संवाद कार्यक्रमलाई सम्बोधन गर्दै गौर नगरपालिकाका नगर प्रमुख अजय गुप्ताले बालविवाह गम्भीर सामाजिक चुनौती रहेको बताएका छन्। उनले गौर नगरपालिकाले बालबिबाह न्यूनीकरणको लागि निरन्तर प्रयासहरू जारि राखेको बताउँदै धार्मिक व्यक्तिहरूको परिचालनले सामाजिक कूरुतिहरू बिरुद्ध लड्न सकिने बताए । सोहि कार्यक्रमलाई सम्बोधन गर्दै प्रमुख जिल्ला अधिकारि इन्द्रदेव यादवले प्रहरीको डर र कानूनी कार्बाहीले मात्रै पनि बालबिबाह न्यूनीकरण हुन् नसक्ने बताउँदै सामाजिक रुपमै अभियान थालिनु पर्नेमाजोड दिए । प्रजिअ यादवले समाजमा धर्मको प्रभाव अत्याधिक रहेको अवस्थामा धार्मिक व्यक्तिहरूको परिचालनले सामाजिक कुरीति बिरुद्ध लडन सजिलो हुने बताए ।
तपाईको प्रतिक्रिया !!