धर्मेन्द्र पासवान । सिरहा । सिरहाको बरियारपट्टी गाउँपालिका १ को कचनारीमा रहेको आधारभूत विद्यालयमा दुई जना प्रधानाध्यापक रहेको पाईएको छ । करिब ६ महिना देखि सो विद्यालयमा दुबै जना शिक्षकले आफु प्रधानाध्यापक रहेको दावी गर्दै आइरहेका हुन्। विद्यालयमा प्रधानाध्यापकको विषयमा विवाद सृजना हुँदा विद्यार्थीको भविष्य अन्यौलमा परेको छ । कक्षा ८ सम्म संचालनमा रहेको सो विद्यालयमा २०७७ भदौ १७ गतेदेखि प्रधानाध्यापकको बिषयमा आपसी विवाद चल्दै आईरहेको छ । प्रधानाध्यापकको विषयमा आपसी विवादका कारण उच्च अदालत जनकपुर राजविराज इजलासमा मुद्दा दायर भएको छ । चारजना शिक्षक मात्र रहेको सो विद्यालयमा दुई जना शिक्षकबीच निमित्त प्रधानाध्यापकको विषयमा विवाद हुँदा सो विद्यालयको पठनपाठन प्रभावित भएको स्थानीयले बताएका छन्।
विद्यालयका तत्कालीन प्रधानाध्यापक सहदेव यादवको २०७७ वैशाख १० गते देखि अनिवार्य अवकाश भएपछि विद्यालयको सम्पुर्ण प्रशासनिक कामकाज समेत निमित्त प्रधानाध्यापक रामनाथ भगत यादवले नै सम्हाल्दै आई रहेका थिए । शिक्षा विकास तथा समन्वय ईकाइ सिरहा कार्यालयले कार्यगत वरिष्ठताको आधारमा प्रधानाध्यापकको रुपमा यादवलाई मान्यता दिईरहेको वेला गाउँपालिकाले मिति २०७७ भदौ १७ गतेका दिन सोही विद्यालयमा काजमा हनुमान प्रसाद शारदा मावि भगवानपुरबाट विन्देश्वर प्रसाद यादवलाई निमित्त प्रधानाध्यापकको रुपमा पठाएर विवाद खडा गरको े शिक्षक यादवले जानकारी गराएका छन्। उनका अनुसार गाउँपालिकाले काजमा पठाएको विन्देश्वर प्रसाद यादवलाई विद्यालयले सहमति नदिए पनि हाजिर नै नगराई कसरी प्रधानाध्यापक भयो ? स्थानीयले प्रश्न गरेका छन्। उनीहरूले विन्देश्वर यादवलाई काज फिर्ताको लागि शिक्षा विकास तथा समन्वय ईकाइ सिरहाबाट मिति २०७७ माघ २० गते आधिकारीक रुपमा पत्र आईसकेको भए पनि उनले विद्यालय नछाडेको शिक्षक यादवले आरोप लगाए ।
शिक्षक यादवले आफूलाई प्रअ सावित गर्न अदालतमा मुद्धा दायर गरका े छन्। अदालतको फैसलाको सुनुवाई चैत्र ८ गते हुँदैछ । ऐनमा सेवा निवृत्त हुन लागेका प्रधानाध्यापकले विद्यालयको सम्पूर्ण जिम्मेवारी वरिष्ठताको आधारमा सोही विद्यालयको कुनै शिक्षकलाई दिनुपर्छ । विद्यालयमा कुनै शिक्षक हाजिरी हुँदा सोको सहमति अहिले स्थानीय तहको सिफारिसमा शिक्षा विकास तथा समन्वय ईकायले सरुवा गर्ने प्रावधान रहेको छ । यता आफु नै प्रधानाध्यापक भनी दावी गर्दै आइरहेका विन्देश्वर प्रसाद यादवले भने ‘मलाई गाउँपालिकाले मिति २०७७ भदौ १७ गते निमित्त प्रधानाध्यापकको लागि पत्र दिएको छ । गाउँपालिकाले काज फिर्ता पठाए विद्यालयबाट जान्छु।’ शिक्षा विकास तथा समन्वय ईकाइले पठाएको काज फिर्ताको आधिकारिक पत्र आफद्रले अहिले सम्म प्राप्त नगरेको शिक्षक यादवले जिकिर गरे। कार्यालयको कुनै काम पर्दा दुवै जना शिक्षकले आफू खुसी विद्यालयको लेटरप्याडमा हस्ताक्षर गरि आफू नै प्रअ रहेको दावी गर्दै आईरहेका छन्। गाउँपालिका शिक्षा शाखाका प्रमुख पतासी यादव भन्छन्– रामनाथ भगत यादव प्राथमिक शिक्षक द्वितीय रहेको र विन्देश्वर यादव निम्न माध्यमिक शिक्षक रहेकोले तहगत र उपल्लो हिसाबले गाउँपालिकाले विन्देश्वर यादवलाई नै निमित्त प्रअको सम्पूर्ण अधिकार दिएको थियो।
तर तत्कालीन ईकाइ प्रमुखले विन्देश्वर यादवको काज फिर्ता गरि दिएकोले विद्यालयमा प्रअको विवाद चुलिँदै आएको छ । शिक्षा अधिकृत यादवका अनुसार रामनाथ यादवले विन्देश्वर यादवलाई वरबुजारथ नबुझाएका कारण रामनाथ यादवको तलब साउनदेखि रोक्का भएको छ । अदालतको फैसला नआउँदा सम्म विद्यालयमा प्रअको दरबन्दी खाली नै रहने शिक्षा अधिकृत यादवको तर्क रहेको छ । विद्यालयमा ४ सयको हाराहारीमा विद्यार्थीहरू अध्यनरत गरिरहेका छन्। एउटा कार्यालय सहयोगी र प्रअ गरी ४ जना शिक्षकमा दुई जना बालविकासको महिला शिक्षकको भरमा विद्यालयमा कक्षा संचालन भइरहेको छ । विद्यालयमा कक्षा कोठाको पनि चरम अभाव रहेको छ, जसका कारण कक्षा १ देखि कक्षा ३ सम्मका विद्यार्थीहरू एउटै कोठामा अध्ययन गर्न बाध्य छन् भने कक्षा ४ र ५ एउटा कोठामा र ६, ७ का विद्यार्थीहरूले एउटा कक्षा कोठामा अध्ययन गर्न‘ परिरहेको विद्यार्थीहरूले बताएका छन्। कुनै वर्ष पनि पाठयक्रम अनुसारको पढाई नभएको र कहिले पनि सम्पूर्ण घण्टी पढाई नभएको विद्यार्थीहरूले गुनासो गरका े छन्। विद्यलयमा ५ वर्ष भन्दा बढी भयो व्यवस्थापन समिति नबनेको। विद्यालयमा व्यवस्थापन समिति नहुँदा विद्यालयमा दिवा खाजा कार्यक्रम पनि संचालन हुन सकेको छैन । विद्यालयमा फर्निचरको राम्रो व्यवस्था नहुँदा तल्लो तहका विद्यार्थीहरू भुईंमै बसेर अध्ययन गर्न बाध्य छन्। विद्यालयमा स्वच्छ खानेपानी र शौचालयको समेत उचित प्रबन्ध नरहेको विद्यार्थीहरूले गुनासो गर्दै आइरहेका छन्।
तपाईको प्रतिक्रिया !!