सप्तरी : राजविराजमा आज भएको देवसुन्दर स्मृति प्रथम राष्ट्रिय भारोत्तोलन प्रतियोगितामा सप्तरीकी १६ वर्षीया सरिता यादव र कञ्चनपुरका १९ वर्षीय अशोकसिंह भण्डारीले नवप्रतिभाशाली खेलाडीका रुपमा पुरस्कार प्राप्त गर्नुभएको छ ।
राष्ट्रिय भारोत्तोलन प्रतियोगितामा महिलातर्फ यादव र पुरुषतर्फ भण्डारी आफ्नो तौल समूहमा स्वर्ण पदक प्राप्त गर्नाका साथै नवप्रतिभाशाली खेलाडी घोषित हुनुभएको हो । उहाँहरुले स्वर्ण पदकवापत पदक र प्रमाणपत्र तथा नवप्रतिभाशाली खेलाडीवापत कप र रु पाँच हजार प्राप्त गर्नुभयो ।
नवप्रतिभाशाली यादवले प्रतियोगिताको महिला ५९ केजी तौल समूहमा जुनियरतर्फ स्न्याचमा ५० किलो र क्लिन एण्ड जर्कमा ६० किलो तौल उचालेर कूलमा ११० किलो भार वहन गर्नुभयो । सो समूहमा स्न्याचतर्फ ४० र क्लिन एण्ड जर्कतर्फ ५० गरी कूलमा ९० किलो भार बहन गरी द्वितीय हुनुभएकी बर्दियाकी ललिता हेमरान युवातर्फ प्रथम हुनुभयो ।
नवप्रतिभाशाली खेलाडी कञ्चनपुरका भण्डारीले पुरुषको ६७ किलो तौल समूहमा स्न्याचतर्फ ७६ किलो र क्लिन एण्ड जर्कमा १०२ गरी कूलमा १७८ किलो भार वहन गर्नुभयो । सो समूहमा बाँकेका तुषार बुढा मगरले स्न्याचमा ६७ र क्लिन एण्ड जर्कमा ९० किलो गरी कूलमा १५७ किलो भार वहन गरेर रजत पदक प्राप्त गर्नुभयो । पर्साका नीरजकुमार गुप्ता स्न्याचमा ७० र क्लिन एण्ड जर्कमा ८० गरी कूलमा १५० किलो उचालेर तृतीय हुनुभयो । राजविराजमा भएको राष्ट्रिय प्रतियोगितामा विभागीय तीनै टोलीका साथ २० जिल्लाका ४७ महिला र ७३ पुरुष गरी १२० खेलाडी सहभागी छन् ।
यसअघि गए राति नेपाल पुलिस क्लबकी तारादेवी पुन र कञ्चनपुरका सुवास उपाध्याय राजविराजमा भएको देवसुन्दर यादव प्रथम स्मृति राष्ट्रिय भारोत्तोलन प्रतियोगिताको स्ट्रङगेष्ट खेलाडी घोषित हुनुभएको छ । पुन महिला र उपाध्याय पुरुषतर्फ सो विधामा चुनिनुभएको हो । दुवैले कपसहित रु पाँच हजार पुरस्कार पाउनुभयो ।
राष्ट्रिय प्रतियोगितामा स्वर्ण पदक विजेता पुनले स्न्याचमा ६७ं किलो र क्लिन एण्ड जर्कमा ९० किलो तौल उचाल्नुभयो । सिनियर महिलातर्फ ८७ किलोग्राम तौल समूहमा कूल १५७ किलो तौल उचालेर प्रथम हुनुभएकी पुन प्रतियोगिताको स्ट्रङ वुमनसमेत घोषित हुनुभएको हो । कञ्चनपुरका उपाध्यायले स्न्याचमा ११४ं किलो र क्लिन एण्ड जर्कमा १३५ किलो गरी कूल २४९ किलो तौल उचाल्नुभयो । पुरुष सिनियरतर्फ १०९ किलो तौल समूहमा स्वर्ण पदक जित्नु भएका उपाध्याय पुरुषतर्फ स्ट्रङ म्यान घोषित हुनुभयो ।
सो तौल समूहमा बाराका आसिफ हुसे स्न्याचमा १०७ र क्लीन एण्ड जर्कमा १२० गरी कूल २२७ किलो तौल उचालेर रजत पदक प्राप्त गर्नुभयो । बर्दियाका रोशन बिसीले स्न्याचमा ७० र क्लीन एण्ड जर्कमा १०५ गरी कूल १७५ किलो तौल उचालेर कास्य पदक प्राप्त गर्नुभयो । पुरुष १०२ किलो तौल समूहमा नेपाल प्रहरीका सागर भण्डारी कूल २२२ किलो उचालेर प्रथम हुनुभयो । सशस्त्र प्रहरी बलका रणबहादुर नगरकोटी कूल २१६ किलो उचालेर द्वितीय तथा नेपाली सेनाका विकास खड्का कूल २०५ किलो उचालेर तृतीय हुनुभयो । पुरुष सिनियरतर्फ १०९ किलोमाथिको समूहमा नेपाल प्रहरीकै राजेश महर्जनले स्वर्ण प्राप्त गर्नुभयो । उहाँले स्न्याचमा १०७ र क्लिन एण्ड जर्कमा ११५ गरी कूल २२२ किलो तौल उचाल्नु भयो । राजविराजमा भएको राष्ट्रिय प्रतियोगितामा विभागीय तीनै टोलीका साथ २० जिल्लाका ४७ महिलासहित १२० खेलाडी सहभागी छन् ।
तपाईको प्रतिक्रिया !!