कमलेश ठाकुर ,जनकपुरधाम : धनुषाको एक विद्यालयमा जन्तीलाई राखेपछि पठनपाठन नै प्रभावित भएको छ । धनुषाको मिथिला विहारी नगरपालिका ३ स्थित माध्यमिक विद्यालयमा जन्ती राखेपछि पठनपाठन प्रभावित बनेको हो।
प्रधानाध्यापक लालबाबु यादवकै सहमतीमा स्थानीयले विद्यालय भवनमा जन्तीलाई राखेको स्थानीयले बताएका छन्। तर प्रधानाध्यापक यादव भन्छन्, ‘१५ दिन पहिले नै विद्यालयमा जन्ती राख्न अनुमती दिन केहि व्यक्ति आएको थियो। हामीले अनुमति दिएनौं ।
तर जर्वजस्ती विद्यालयमा जन्ती राख्यो।’ मंगलवार विद्यालय पुगेपछि मात्र जन्ती राखेको कुरा थाहा पाएको उनको भनाई छ । मंगलवार विद्यालय पुगेलगत्तै जन्तीलाई खाली गराएको प्रधानाध्यापक यादवले बताए । उनले जन्तीका कारण पठनपाठन प्रभावित बनेको उनले स्वीकारे। उनले कसको छोरीको विहेमा जन्ती आएको कुरा समेत आफूलाई थाहा नभएको बताए ।
विद्यालय भवनमा जन्ती राखेपछि मंगलवार विद्यार्थीलाई रुखमुनी राखेर पठन–पाठन गराएको छ । यता, नगर प्रमुख अनिल कुमार यादवले विद्यालयमा जन्ती राखेको कुरा थाहा नभएको बताए । उनले टुडे एक्सप्रेससँग भने, ‘विद्यालयमा जन्ती राख्न मिल्दैन । नगरपालिकाले सबै ठाउँमा सार्वजनिक भवन बनाएकै छ । तर पनि विद्यालयमा जन्ती राखेको हो भने यसबारे म बुझ्छु ।’
तपाईको प्रतिक्रिया !!