संजय मिश्रा, रौतहट : रौतहटको मौलापुर नगरपालिका ५ पतौरा स्थित पुरातात्विक महादेव मन्दिरमा महाशिवरात्रि पर्वको अवसरमा हुन लागेको मधानी महायज्ञको सम्पूर्ण तयारी पुरा भएको छ ।
आयोजक मौलापुर नगरपालिकाले मन्दीर प्राङ्गणमै सोमवार पत्रकार सम्मेलनको आयोजना गरी महायज्ञको तयारीबारे जानकारी गराएको हो । महाशिवरात्रिको अवसरमा महायज्ञका साथै भव्य मेला तथा सांस्कृतिक कार्यक्रम समेत आयोजना हुन लागेको पत्रकार सम्मेलनमा उपमेयर गौरीशंकर जयसवालले बताएका छन्। स्थानीय स्तरमै पर्यटन प्रवद्र्धन गर्ने उद्देश्यले मौलापुर नगरपालिकाले फागुन २७ गते पर्ने महाशिवरात्रि पर्वको अवसरमा मेला आयोजना गर्न लागेको उपमेयर जयसवालले जानकारी दिएका छन ।
ऐतिहासिक, धार्मिक तथा सांस्कृतिक महत्व झल्किने गरी आयोजना हुने उक्त मेलाको अवसरमा पुरातात्विक महादेव मन्दिरमा स्थानीय तथा विशेष विधिहरूबाट भगवान शिवको पुजा अनुष्ठान गरिने उपमेयर जयसवालले बताएका छन्। फागुन २६ गतेबाट नै मेलाको शुभारम्भ गरिने भएपनि मुल पुजा भने फागुन २७ गते शिवरात्रिको दिन हुनेछ । कार्यक्रमको उदघाटन प्रदेश २ का प्रदेश प्रमुख राजेश झाले गर्ने योजना रहेको मौलापुरका निमित्त प्रमुख प्रशासकिय अधिकृत रामबाबु साहले पत्रकार सम्मेलनमा बताएका छन । सोही दिन दिउँसो १ बजेदेखि भारतिय भोजपुरी सुपरस्टार अभिनेत्री अक्षरा सिंह तथा अभिनेता प्रदीप पाण्डे ’चिन्टु’ लगायतका लोकप्रिय नेपाली एवम् भारतीय कलाकारहरूको सांस्कृतिक प्रस्तुति रहने बताइएको छ ।
साथै फागुन २६ गते देखि लगातार ६ दिनसम्म रात्रि भारत वृन्दावनको मथुराका कलाकारद्वारा प्रसिद्ध रासलिला (शिवलिला) प्रदर्शन हुने निमित प्रमुख प्रशासकिय अधिकृत साहले जानकारी दिए । गत वर्ष पनि फागुनमा पुरातात्विक महादेव मन्दिरको प्राङ्गणमा मधानी महायज्ञको आयोजना गरिएको थियो। कार्यक्रमका प्रमुख अतिथि समेत रहेकी राष्ट्रपति विद्यादेवी भण्डारीले पशुपतिनाथ मन्दिरको मुल भट्टद्वारा मन्त्रोच्चारण गराई उक्त मन्दिरमा विशेष पुजा गरेकी थिइन् । मेला आयोजना हुन लागेको पुरातात्विक महादेव मन्दिर १२०० वर्ष पुरानो रहेको पुरातात्विक उत्खननबाट देखिएको थियो। सो मन्दिर पर्यटकहरूका लागि एउटा महत्वपूर्ण गन्तव्य बनाउन सहरी विकास मन्त्री प्रभु साहको पहलमा मौलापुर नगरपालिकाले मन्दिरको संरक्षण एवम् प्रचारको कार्य गर्दै आएको छ ।
तपाईको प्रतिक्रिया !!