काठमाडौं : प्रधानमन्त्री केपी शर्मा ओलीले बालबालिका भट्टाउँदा ठूला–ठूला काम पनि छाडेर पनि उनीहरुसँग रमाउनु आफ्नो कमजोरी भएको बताएका छन् ।
मंगलबार बालमन्दिरमा बालबालिकासँग ७० औँ जन्मदिन मनाउने क्रममा उनले भने, ‘बालबालिका भट्टायो र खेल्न पाएँ भने ठूला–ठूला काम पनि छाडेर उनीहरुसँग खेल्न थाल्छु । यो मेरो कमजोरी पनि हो ।’
उनले अब कोही पनि बालबालिका अनाथ र साहराविहिन हुन नपरोस् भनेर सरकारले उनीहरुको जिम्मा लिँदै अगाडि बढेको बताए ।
प्रधानमन्त्रीले मानवअधिकारका अभियानहरु अहिले बहकिन थालेको उल्लेख गर्दै भने, ‘मानवअधिकारका अभियानहरु बहकिन हुँदैन ।’
‘आज सडक बालबालिका देखिँदैनन् । देखिँनु हुँदैन । यदि देखिए भने सरकारले उद्दार गर्छ ।’ उनले भने, ‘बालबालिकाको भविष्य जस्तो हुन्छ, देशको भविष्य त्यस्तै हुन्छ ।’
प्रधानमन्त्री ओलीले नेपाल गरिब भएपनि बेसहारा बालबालिका मुलुकका लागि बोझ नहुने बताए ।
कार्यक्रममा प्रधानमन्त्री पत्नी राधिका शाक्यले बालमन्दिरका बालबालिकालाई खेलकुद सामग्री वितरण गरिन् । यस्तै बालबालिकाले सांस्कृतिक प्रस्तुति पनि राखेका थिए । त्यसअघि, बालबालिकाको माझमा प्रधानमन्त्रीले जन्मदिनको केक काटेका थिए ।
तपाईको प्रतिक्रिया !!