काठमाडौं : प्रधानमन्त्री केपी शर्मा ओलीले मुलुकलाई अशान्ति र हिंसाको भुमरीमा जान नदिने प्रतिबद्धता जनाएका छन् ।
शुक्रबार नेकपा ओली समूहको वाग्मती प्रदेश कमिटीले काठमाडौंको दरबारमार्गस्थित नारायणहिटीअगाडि गरेको सभालाई सम्बोधन गर्दै उनले नेपालमा फेरि कसैले अशान्ति र हिंसा मच्चाउन नसक्ने बताए ।
उनले प्रचण्ड–नेपाल समूहले नरभक्षी आन्दोलन गर्न खोजेको भन्दै सरकारले त्यसो हुन नदिने बताए । नेपाल बन्द गरेर श्रमजीवीका लागि काम गर्ने भन्नेहरुले तरकारी छरेर, गाडी जलाएर क्रान्ति गर्न खोजेको भन्दै प्रधानमन्त्री ओलीले प्रचण्ड–नेपाल समूहलाई व्यंग्य गरे ।
उनले भने, “उहाँहरु भन्नुहुन्छ, अब शाकाहारी आन्दोलनलाई हुँदैन भनेर । शाकाहारी आन्दोलन हुँदैन भनेको के हो रु चिकेन चिल्ली खान्छु भन्या हो रु उहाँले नरभक्षी आन्दोलन गर्न खोजेको हो । म उहाँहहरुलाई भन्दिन चाहन्छु, नरभक्षी आन्दोलनका दिन गए । अब नेपालमा कसैले हिंसा मच्चाउन सक्तैन । नेपाल शान्तिपूर्ण । अब नेपाल अशान्ति र हिंसाको भुमरीमा जान सक्तैन । शान्तिपूर्ण नेपाल रहन्छ ।”
प्रधानमन्त्री ओलीले आफूलाई काम गर्न नदिएपछि ताजा जनादेशमा गएको दाबी गरे । जनताले सरकारलाई पाँच वर्ष काम गर्ने म्यान्डेट दिएको भए पनि प्रचण्ड–नेपाल समूहले व्यवधान गरेकाले संसद् विघटन गरी ताजा जनादेशमा गएको उनको भनाइ थियो ।
‘‘जब उहाँहरुले काम गर्न दिनुभएन, लोकतन्त्रलाई ठिक ढंगले चल्न दिनुभएन । संसद्लाई ठिक ढंगले चल्न दिनुभएन । संसद्लाई केही पनि काम गर्न नसक्ने अवस्थामा पुर्याउनुभयो । काम गर्नै नदिने, काम गर्नै नपाउने अवस्था आएपछि नेपाली जनताका माझ ताजा जनादेशमा जानुपर्यो,” उनले भने ।
प्रधानमन्त्री ओलीले मुलुकभरको कालोपत्रे सडक, चाँदनी–दोधारा सिँचाइ, डुबान नियन्त्रण, हुलाकी राजमार्ग, पूर्व–पश्चिम रेललगायत क्षेत्रमा सरकारले उच्च महत्वका साथ काम गरेको भन्दै फेहरिस्त प्रस्तुत गरे ।
तपाईको प्रतिक्रिया !!