विनय कर्ण
सिरहा : भूमी व्यवस्था तथा कृषि सहकारी मन्त्री शैलेन्द्र साहले बिना तयारी स्थाीनय सरकारको मातहतमा विद्यालय राखिनुले शिक्षाको गुणस्तर अझै खस्किदै गएको बताएका छन्। उनले स्थानीय तहले शिक्षालाई प्राथमिकतामा राख्ने नगरेकोले सरकारी विद्यालयको शैक्षिक गुणस्तरमा ह्रास आउँदै गएको बताए ।
राजविराजस्थित सम्पर्क कार्यालयमा शनिवार आर्थिक बर्ष २०७६।०७७ मा चट्याङ्ग लागेर सप्तरीमा मृत्यु भएको परिवारजनलाई आर्थिक सहयोग उपलब्ध गराउन आयोजित कार्यक्रमलाई सम्बोधन गर्दै मन्त्री साहले प्रदेश नम्बर २ को ८ वटै जिल्ला कृषि प्रधान जिल्ला भएको भएपनि कुनैपनि स्थानीय तहले कृषि, शिक्षा र स्वास्थ्यलाई बजेटको प्राथमिकतामा स्थान नदिएको टिप्पणी गरे। ‘स्थानीय तहले शिक्षा, स्वास्थ्य र कृषि जस्ता महत्वपूणर् विषयलाई प्राथमिकता दिनु पर्छ तर दिएको छैन, विद्यालयको शिक्षकले परिषद् नहुँदा तलवसम्म खान सकेको छैनन्, दरवन्दी मिलान भएको छैन्, शिक्षाको गुणस्तर खस्किदै गएको छ ।
विना तयारी सरकारले शिक्षालाई स्थानीय तहमा राखेको परिणाम हो यो, यसका लागि शिक्षक मात्रै होईन सरकार पनि जिम्मेवार छ,’ उनले भने। प्रदेश सरकारले शिक्षा ऐन ल्याउन लागेको जानकारी दिदै मन्त्री साहले अव शिक्षाको गुणस्तमा सुधार आउने विश्वास व्यक्त गरे। उनले शिक्षा, स्वास्थ्य र कृषिलाई बजेटको प्राथमिकतामा राख्न स्थानीय सरकारलाई सुझाव दिए । कार्यक्रममा चट्याङ्ग लागेर मृत्यु भएका ४ जनाको परिवारका सदस्यहरूलाई प्रदेश सरकारको तर्फबाट जनही रु १ लाख सहयोग उपलब्ध गराइएको छ ।
सप्तरीको महदेवा गाउँपालिका वार्ड नम्बर २ निवासी विनादेवी ठाकुर, रुवी कुमारी यादव, राजगढ गाउँपालिका वार्ड नम्बर ४ का शिवकुमारी साह र डाक्नेश्वरी नगरपालिका वार्ड नम्बर ९ का विसन प्रसाद यादवलाई मन्त्री साहले चेक हस्तान्तरण गरे। सोही कार्यक्रमा सप्तरीको निर्वाचन क्षेत्र नम्बर २(क) र ३(ख) अन्तर्गतका विद्यालयहरूलाई ५० थान थर्मल गन वितरण गरिएको छ । साहले आफ्नो तर्फबाट १/१ थान थर्मल गन समेत वितरण गरेका हुन्। प्रदेश सभा सदस्य विदेश्वर यादव र नेत्रविक्रम साहको उपस्थितिमा चेक र थर्मल गन हस्तान्तरण गरिएको स्वकीय सचिब नवनित झाले जानकारी दिए ।
तपाईको प्रतिक्रिया !!