टुडे एक्सप्रेस । काठमाडौं । पुष्पकमल दाहाल ‘प्रचण्ड’– माधव नेपाल नेतृत्वको नेकपाले प्रतिनिधिसभा विघटनविरुद्ध मंगलवार देशभर विशाल शक्ति प्रदर्शन गरेको छ । काठमाडौंका विभिन्न १३ ठाउँबाट केन्द्रीय नेताको अगुवाईमा जुलुस निकालियो । भृकुटीमण्डपमा पुगेको जुलुस कोणसभामा परिणत भयो । सभामा हजारौँको सहभागिता देखेपछि उत्साहित भएका प्रचण्ड–नेपाल खेमाका नेताहरू प्रधानमन्त्री केपी शर्मा ओलीविरूद्ध खनिए । विरोध सभामा बोल्दै नेकपा अध्यक्ष प्रचण्डले चुनाव गराउन प्रधानमन्त्री ओलीले संसद विघटन नगरको दावी गरे।
उनले चुनाव हुँदैमा ऐतिहासिक गलत नजिर बस्ने भन्दै नेपाली जनताको भाग्य भविष्य के हुन्छ भन्ने चिन्ता लागेको बताए । उनले नेपाली जनताको भाग्य भविष्य बनाउन पनि संसद पुनस्र्थापना गर्नका लागि सबै राजनीतिक दललाई आह्वान समेत गरे। संसदको रक्षा गर्ने जिम्मेवारी सबैको जिम्मेवारी भएको भन्दै प्रचण्डले संविधानको रक्षा गर्न सबैमा अपील गरे। उनले सबैलाई एक महिनामात्रै सडक आन्दोलनमा साथ दिए प्रतिगमन सच्चिने पनि बताए । नेकपाका अर्का अध्यक्ष माधव कुमार नेपालले निरंकुश शैली अपनाएकाले प्रधानमन्त्री ओलीले नेतृत्व गर्ने समय सकिएको बताए । उनले भने, ‘राजतन्त्र विरोधी आन्दोलनका क्रममा पनि मैले भनेको थिएँ। नेपालमा राजतन्त्र तानाशाह भयो अब राजतन्त्रको आयु सकियो।
आज पनि म यो विशाल सभालाई सम्बोधन गर्दै भन्छु निरंकुश शैली अपनाएकाले प्रधानमन्त्री केपी ओलीको पनि नेतृत्व गर्ने आयू अब सकियो।’ ओलीलाई सुधार्न लागेकाहरूलाई उनले भने, ‘बालुवाटारको बालुवा पेल्दा तेल निकाल्न सक्नुभयो भने स्याबासी दिन्छु।’ ओलीले गल्ती स्वीकाररे आएमा,असंवैधानिक कदमबाट पछि हटेर संसद पुनस्र्थापना गर्न तयार भएमा छलफल गर्न सकिने शर्त समेत उनले सुनाए । यता, नेता झलनाथ खनालले प्रधानमन्त्री ओलीले संविधानको बलात्कार गरेको आरोप लगाए । उनले भने, ‘अहिले देशभरबाट राजनीतिक दल, नागरिक समाज सडकमा उत्रिएका छन्। हामीलाई हरक पटक सडकमा आउने रहर होइन । केपी ओली जस्ता तानाशाहले लोकतन्त्रलाई खोस्ने प्रयास गरेका छन् । संविधानमाथि बलात्कार गरेका छन् । त्यसैले बाध्य भएर सडकमा उत्रनु परेको छ ।’
पूर्वप्रधानमन्त्री समेत रहेका उनले बालुवाटारमा अहिले तानाशाहको एक गुट मात्र रहेको बताए । जनताले लोकतन्त्रको रक्षा गर्दै देशको विकास र समृद्धिका लागि दिएको भोट प्रधानमन्त्री ओलीले दूरुपयोग गरेको आरोप लगाए । पार्टीका नीति कार्यक्रम सबै बिर्सिएको आरोप लगाउँदै उनले प्रश्न गरे, ‘कहिले पानी जहाजको कुरा गर्न‘भयो, कहिले घरघरमा पाइपबाट ग्यास ल्याउने कुरा गर्न‘भयो। खोइ पानी जहाज ? खोइ घरघरमा ग्यास पाइप ?’ पार्टीको आन्तरिक विवादमा जनप्रतिनिधिको थलो प्रतिनिधिसभालाई प्रधानमन्त्री र राष्ट्रपतिको मिलेमतोमा असंवैधानिक तवरले पुस ५ मा भंग गरिएको भन्दै प्रचण्ड–नेपाल समूहले देशव्यापी प्रदर्शन गरेको हो। यही पुस ७ देखि ९ गतेसम्म बसेको नेकपा प्रचण्ड–नेपाल समूहको केन्द्रीय कमिटी बैठकले देशव्यापी जनप्रदर्शन गर्ने निर्णय गरेको थियो ।
तपाईको प्रतिक्रिया !!