टुडे एक्सप्रेस । पनकपुरधाम । संसद विघटनविरुद्ध नेपाली कांग्रेसले सोमवार देशभरका प्रतिनिधिसभा निर्वाचन क्षेत्रमा प्रदर्शन गरेको छ । संसद विघटन अलोकतान्त्रिक र असंवैधानिक भएको भन्दै कांग्रेसले प्रदर्शन गरेको हो । प्रदर्शनमा पनि कांग्रेसमा दुई धार देखियो। कांग्रेस सभापति शेरबहादुर पक्षका नेताहरूले अब चुनावको तयारीमा लाग्नुपर्ने धारणा राखेका छन् भने बरिष्ट नेता रामचन्द्र पौडेल पक्षका नेताहरू संविधानको रक्षा गर्न संसद पुनस्र्थापना गराउन जस्तोसुकै आन्दोलन गर्न तयार रहेको बताएका छन्। भक्तपुर क्षेत्र २ मा आन्दोलनको नेतृत्व गरेका सभापति देउवाले संसद विघटन सम्वन्धि सर्वोच्च अदालतको कोर्टबाट हुने फैसलालाई कांग्रेसले कुर्ने बताए । उनले कांग्रेस लोकतान्त्रिक पार्टी भएको र अदालतको आदेशको समेत पालना गर्ने पार्टी भएकाले संसद विघटनका विषयमा पनि अदालतको निणर्य हेररे थप निर्णय लिने बताए ।
‘संसद विघटको मुद्दा अदालत पुगिसकेको छ’, उनले भने,‘अदालतमा विचराधीन मुद्दामा कांग्रेस यो गर त्यो गर भन्दैन, निणर्य कुर्छ । कांग्रेस कानून मान्ने पार्टी हो ।’ नेपालगंजमा भएको प्रदर्शनमा सहभागी कांग्रेस युवा नेता गगन थापाले संसद विघटनको विषयमा सर्वोच्च अदालतले न्याय दिने विश्वास व्यक्त गरे । उनले भने, ‘अदालतले न्याय देओस श्रीमान्, अदालत प्रति जनताको आस्था र सम्मान छ, श्रीमान न्यायको हत्या नहोस् ।’ यस्तै नेपाली कांग्रेसका प्रवक्ता विश्वप्रकाश शर्माले राष्ट्रपति विद्यादेवी भण्डारी, प्रधानमन्त्री केपी ओली, नेकपाका अध्यक्ष पुष्पकमल दाहाल, माधवकुमार नेपालको कारणले संसद् विघटन भएको बताएका छन्। काठमाडौं क्षेत्र २ मा गरिएको प्रदर्शनमा सहभागी उनले भने, ‘सम्माननीय राष्ट्रपति विद्यादेवी भण्डारीज्यू, यो देशको संवैधानिक राष्ट्रपति कस्तो काम गर्न‘पर्छ भन्ने ज्ञान लिनका लागि डा. रामवरण यादव कहाँ ट्युसन पढ्न जानुस्।’
धनुषामा पनि प्रदर्शन
प्रधानमन्त्री केपीशर्मा ओलीको सिफारिसमा राष्ट्रपतिले गरेको संसद विघटनको विरुद्धमा धनुषमा पनि नेपाली कांग्रेसले प्रदर्शन गरेको छ । संसद विघटन असंवैधानिक एवं अलोकतान्त्रिक रहेको भन्दै धनुषाका चारवटै निर्वाचन क्षेत्रमा प्रदर्शन गरेको हो । क्षेत्र १ को धनुषाधाममा, क्षेत्र २ को शहिदनगरमा, क्षेत्र ३ को नगराईनमा र क्षेत्र ४ को महेन्द्रनगरमा विरोध प्रर्दशन गरेको कांग्रेसले जनाएको छ । नेपाली कांग्रेस क्षेत्र ३ मा प्रदर्शन पश्चात कोणसभामा बोल्दै वक्ताहरूले संविधानको रक्षाका लागि संसद पुर्नस्थापना हुनुपर्ने धारणा राखेका छन् ।
कांग्रेसको नेतृत्वमा संविधान बनेको स्मरण गराउँदै संविधानको रक्षा गर्ने अभिभारा पनि कांग्रेसको भएको उनीहरूको भनाई थियो । नेपाली कांग्रेस क्षेत्र ३ का क्षेत्रीय सभापति कन्हैया कर्णको अध्यक्षतामा भएको विरोधसभामा नेपाली कांग्रेस प्रदेश २ संसदीय दलका नेता रामसरोज यादव, प्रतिनिधिसभा सदस्य स्मृति नारायण चौधरी, मिनाक्षी झा, प्रदेशसभा सदस्य शिवचन्द्र चौधरी लगायतले मन्तव्य राखेका थिए । धनुषाको क्षेत्र १ को धनुषाधाममा कांग्रेसका नेता आनन्द प्रसाद ढुंगाना, क्षेत्र २ को शहिदनगरमा नेता रामकृष्ण यादव,धनुषाको क्षेत्र ३ को नगराईनमा प्रदेश २ का संसदीय दलका नेता रामसरोज यादव र क्षेत्र ४ को महेन्द्रनगरमा नेता महेन्द्र यादव लगायत ले संसद विघटनको विरोध गरेका छन् ।
तपाईको प्रतिक्रिया !!