सन्तोष यादव । जनकपुरधाम । जनकपुरधाम उपमहानगरपालिका ४ शिव चोकस्थित मिथिला डिपार्टमेन्ट स्टोरमा बिहीवार विहान भएको भीषण आगलागीका कारण करोडौंको क्षति भएको छ । आगो नियन्त्रण गर्ने बारुणयन्त्र (दमकल) समयमा नपुग्दा बढी क्षति भएको हो । विहान करिब १० बजे स्टोरमा आगलागी सुरु भएको थियो। आगो लाग्नुको कारण खुल्न सकेको छैन । विद्युतीय करेन्ट सट भई आगो लागेको प्रहरीको अनुमान छ । यस विषयमा स्टोर संचालकले अनभिज्ञता जनाएका छन्। आगलागीबाट अढाइ करोडको क्षति भएको जिल्ला प्रहरी कार्यालय धनुषाले जारी गरेको विज्ञप्तिमा उल्लेख छ ।
आगलागीका कारण दोस्रो तल्लामा रहेको स्टोरका सबै समान जलेर खरानी बन्यो। भवनमा समेत ठूलो क्षति पुगेको छ । घटनास्थलदेखि जनकपुरधाम उपमहानगरपालिका मात्र २ सय मिटरको दुरीमा रहेको छ । तर त्यहाँ २ थान बारुणयन्त्र रहेपनि एउटै काम लागेन । बारुणयन्त्र बिग्रेको अवस्थामा रहेको बुझिएको छ । आगो लागेको करिब एक घण्टापछि जनकपुर विमानस्थलको बारुणयन्त्र आइपुगेको थियो। लगत्तै बर्दिबास, जलेश्वर, क्षिरेश्वर नाथ,सबैलाबाट समेत बारुणयन्त्र आइपग्यो । तर जनशक्ति अभावमा आगो नियन्त्रणमा लिन झण्डै ३ घण्टा लाग्यो। नेपाली सेना,सशस्त्र, नेपाल प्रहरी र स्थानीय युवाहरूको सक्रियतामा आगलागी नियन्त्रणमा आएको थियो । बारुणयन्त्र आउन ढिलो भएका कारण विशाल रुप लिइसकेको आगलागी नियन्त्रण गर्न हम्मेहम्मे परेको थियो । स्टोरका सञ्चालक हरिकान्त मिश्रले भने,‘आगो लाग्ने वित्तिकै कर्मचारीले फोन गररे भन्यो । म तत्कालै यहाँ आइपुगे। तर त्यति बेलासम्म आगो उग्ररुप लिइसकेको थियो । भित्र पनि छिर्न सकिएन ।’ स्टोरमा करिब ३ करोडको लगानी थियो– उनले थपे ।
‘स्थानीय सरकारले क्षति व्यहोर्नुपर्छ’
जनकपुरधामको बारुणयन्त्र समयमा नआउँदा आगलगीबाट ठूलो क्षति भएको जनकपुरधाम उधोग वाणिज्य संघका महासचिव जीतेन्द्र महासेठले बताए । उनले भने, ‘जनकपुरधाम उपमहानगरपालिकाको दुईवटै बारुणयन्त्र बिग्रेका कारण यति ठूलो क्षति भएको छ । व्यावसायीलाई स्थानीय सरकारले क्षतिपूर्ति व्यहोर्नु पर्छ।’ जनकपुरधाम प्रदेश २ को अस्थायी राजधानी रहेपनि यहाँकै स्थानीय सरकारले बारुणयन्त्र तयार अवस्थामा राख्न नसक्नु ठूलो बिडम्बना हो’, उनले भने। बाहिरबाट बारुणयन्त्र आएपनि तालिम प्राप्त जनशक्ति अभाव देखिएको उनले बताए । बारुणयन्त्रसँगै सबै स्थानीय सरकारले तयार अवस्थामा फायर ब्रगेड टिम राख्नुपर्ने उनको भनाइ छ ।
उपमहानगरपालिका तोडफोडको प्रयास
जनकपुरधाम उपमहानगरपालिकाले बारुणयन्त्र नपठाएको भन्दै स्थानीय युवाहरू आक्रोसित हुँदै कार्यालय तोडफोडको प्रयास गरेका थिए । तर सुरक्षाकर्मीले कार्यालय तोडफोड हुनबाट जोगाए । कार्यालयभित्र छिर्न नदिएपछि आक्रोसित युवाहरू र सुरक्षाकर्मीबीच केहिबेर घम्साघम्सी समेत भएको थियो । बारुणयन्त्र मर्मत गराउन नसकेको र करोडौंको गाडी चढिरहेको भन्दै मेयर लालकिशोर साहविरुद्ध युवाहरूले
नाराबाजी गरे ।
तपाईको प्रतिक्रिया !!