टुडे एक्सप्रेस । जनकपुरधाम । धनुषाको हंसपुर नगरपालिका ९ स्थित माध्यमिक विद्यालय रूदौलीमा सुविधा सम्पन्न ४ कोठे भवन बन्ने भएको छ ।बुधवार एक समारोहबीच नगर प्रमुख रामज्ञान मण्डल,उपप्रमुख रेणु झा र प्रदेश सांसद राम अशिष यादवले संयुक्त रुपमा भवनको शिलान्यास गरे । करिब ४८ लाख ९० हजार १४५ रुपैयाँ ४० पैसाको लागतमा भवन निर्माण गर्ने ठेक्का राजिभ विल्डर्स जनकपुरधाम ६ ले पाएको छ । शिलान्यास भइसकेकाले भवन निर्माण तत्कालै सुरु गर्न नगरप्रमुख मण्डलले ठेकेदार कम्पनीलाई निर्देशन दिए । ०७८ जेष्ठ ३२ गतेभित्र भवन निर्माण सम्पन्न गर्नेगरी सम्झौता भएको छ । तर नगरप्रमुख मण्डलले वैशाखभित्रै भवन तयार पार्ने ठेक्का पाएका कम्पनीले प्रतिवद्धता जनाएको बताए ।
कक्षा १० सम्म पठनपाठन हुने यो विद्यालयमा भवन अभावका कारण एउटै भवनमा दुई वटा कक्षाका विद्यार्थीलाई राख्ने बाध्यता थियो । नगरप्रमुख मण्डल भन्छन्, ‘निरीक्षणको क्रममा यो विद्यालयमा पुग्दा आश्चर्य लाग्यो। भवनको अभावले पठनपाठन प्रभावित भइरहेको थियो । मैलै तत्कालै भवन बनाउने निर्णय लिए । आज शिलान्यास समेत भइसक्यो। अब चाँडै भवन बन्छ ।’ सोही कार्यक्रमबीच विद्यालयकी कक्षा ८ मा अध्ययनरत ५० छात्रालाई नगर प्रमुख मण्डल र उपप्रमुख झाले साइकल समेत बाडेका छन् । विद्यालयको भवन शिलान्यास गर्नुका साथै छात्रालाई साइकल वितरण गरेपछि अभिभावक र विद्यार्थी खुःशी भएका छन् । शिक्षक र अभिभावकहरूले नगर प्रमुख मण्डललाई धन्यवाद समेत दिएका छन् ।
हँसपुरका नगर प्रमुख रामज्ञान मण्डलले शिक्षा क्षेत्र सुधार्ने अभियानमा लागेको बताएका छन्। शिक्षा क्षेत्र सुधार भएपछि मात्र समाज र देश समृद्ध बन्ने उनको भनाई छ । उनले भने, ‘शिक्षा क्षेत्र बर्बाद भएको छ । त्यसैले यसमा विशेष जोड दिएका छौं । भवन अभाव भएका विद्यालयहरूमा भवन बनाउँदै छौं । अब चाँडै शिक्षक मिलान गर्ने प्रक्रिया पनि सुरु गर्छौ ।’कुनै विद्यालयमा बढी र कुनै विद्यालयमा कम शिक्षक भएका कारण पनि समस्या सृजना भएको उनले बताए । उनले विद्यालयमा राजनीति नगर्न शिक्षकहरूसँग अनुरोध गरे। उनले आफ्नो छोरा–छोरीलाई सभ्य र अनुशासित बनाउन अभिभावकहरूसँग पनि आग्रह गरे ।
उनले शिक्षासँगै सिँचाईलाई पनि प्राथमिकता दिएको बताए । ‘नगरपालिकाको सबै वडामा एउटा÷एउटा ८ इन्चको बोर्डिङ जडान गर्न लागेका छौं’, उनले भने,‘वडा १ मा बोर्डिङ जडान सुरु भइसक्यो। अब चाँडै सबै वडामा जडान हुन्छ ।’सिँचाईको समस्या समाधान गररे खेत खेतमा पार्नी पुर्याएर किसानको अनुहारमा खुःशी ल्याउने सोचका साथ काम अगाडी बढाएको उनले भने ।
तपाईको प्रतिक्रिया !!