टुडे एक्सप्रेस । काठमाडौं । सरकारले संवैधानिक परिषद् मा अध्यक्षसहित तत्काल कायम बहुमत सदस्यको उपस्थितिलाई गणपूरक संख्या मान्ने गरी अध्यादेश ल्याएको छ । आइतबार र मंगलबार गरी दुईपल्ट परिषद्को बैठकमा गणपूरक संख्या नपुगेपछि सरकारले मंगलबार दिउँसो अध्यादेश ल्याएको हो। सरकारले संवैधानिक परिषद्सम्बन्धी ऐनको दफा ६ को उपदफा ३ संशोधन गरी ल्याएको अध्यादेश अनुसार अब ३ सदस्य उपस्थित भए गणपूरक संख्या पुरा भएको मानिने छ । हाल परिषद् मा ५ जना सदस्य बहाल छन् भने उपसभामुख रिक्त छ । बैठकमा पेस भएको विषयमा सर्वसम्मत निर्णय हुने र पहिलो बैठकमा निर्णय नभए तत्काल बहाल सदस्यको बहुमत सदस्यका आधारमा निर्णय हुने अध्यादेशमा उल्लेख छ । अध्यादेशमा गरिएको व्यवस्था अनुसार अब सभामुख र प्रमुख प्रतिपक्षी दलको नेता अनुपस्थित भए पनि बैठक बस्ने र तीन जनाको सहमतिमा निर्णय गर्न सक्नेछ ।
अध्यादेशलाई लिएर नेकपा पार्टीभित्रै असन्तुष्टि बढेको छ । संवैधानिक नियुक्तिका विषयमा छलफल नगरको भन्दै नेकपाका अर्का अध्यक्ष प्रचण्डपक्षका नेताहरू प्रधानमन्त्रीसँग असन्तुष्ट बनेका हुन् । उनीहरूले अध्यादेश फिर्ता गर्नुपर्ने माग गरेका छन् । अध्यादेश जारी भएलगत्तै प्रमुख प्रतिपक्षी दलको नेता र सभामुखको उपस्थति बिनै प्रधानमन्त्री केपी ओलीले राखेको संवैधानिक परिषदको बैठक कुनै निर्णय हुन सकेन । राष्ट्रिय सभाका अध्यक्ष गणेश तिमिल्सिनाले बैठकले कुनै नियुक्ति नगरेको जानकारी दिए । विभिन्न संवैधानिक निकायमा रिक्त रहेको पदमा नियुक्तिबारे छलफल मात्रै भएको उनको भनाई छ । यता, नेकपा अध्यक्ष प्रचण्ड र संसदीय दलका उपनेता एवम् स्थायी कमिटी सदस्य सुवास नेम्वाङबीच छलफल भएको छ । नेम्वाङ प्रधानमन्त्री ओलीको सन्देश बोकेर मंगलवार दाहाल निवास खुमलटार पुगेका थिए ।
प्रधानमन्त्री ओलीले समस्या देखिएका सबै बिषयमा छलफल गर्न तयार रहेको जानकारी नेम्वाङले प्रचण्डलाई गराए । ‘प्रधानमन्त्री ज्यूले तपाईसंग सबै विषयमा छलफल गर्न तयार रहेको सन्देश दिनुभएको छ,’ नेम्वाङले भने, ‘मैले त्यही कुरा कार्यकारी अध्यक्षलाई जानकारी गराएँ, पार्टीको सबै विषयमा राम्रोसँग छलफल गर्न तयार रहेको कुरा प्रधानमन्त्रीले बताउनुभएको छ ।’ यस्तै संवैधानिक परिषद सम्बन्धी अध्यादेश जारी भएपछि सो बिषयमा समेत छलफल भएको छ । ‘पछिल्लो राजनीतिक घटनाक्रमको बारेमा समेत छलफल भयो, अध्यादेश ल्याएको विषयमा प्रचण्डले जिज्ञासा राख्नुभयो, तर यस बिषयमा मलाई धेरै जानकारी नभएको भने,’नेम्वाङले सुनाएको छ ।
तपाईको प्रतिक्रिया !!