कमलेश ठाकुर । जनकपुरधाम । कोरोना महामारीबीच जनकपुरधाममा सोमवार (आज) बाट सप्ताहव्यापी विवाहपञ्चमी सुरु हुँदैछ । पुस ५ गतेसम्म चल्ने विवाहपञ्चमीको पहिलो दिन जानकी मन्दिर प्राङ्गनमा नगर दर्शन विधि हुन्छ । बालबालिकालाई राम र लक्ष्मणको स्वरुप बनाई नगर घुमाउने र स्वागत गर्ने गरिन्छ ।
विगतमा नगर दर्शन भव्य समारोहबीच मनाइन्थ्यो। तर कोरोना माहामारीका कारण विधि मात्र पु¥याउने जानकी मन्दिरका महन्थ रामतपेश्वर दासले जानकारी दिए । उनका अनुसार त्रेतायुगमा भगवान राम र लक्ष्मण पहिलो पटक मिथिला आएपछि स्वागतमा मंगलगान गाएर नगर दर्शन गराएको थियो । कोरोना फैलिने जोखिमका कारण प्रशासनले भीडभाड नगर्न आग्रह गरेका कारण साधु सन्त बाहेक कसैको उपस्थिति रहने छैन । महन्थ दासले जनकपुरधामको साधुसन्त बाहेक अन्य कुनै अतिथिलाई निमन्त्रणा नगरेको बताए । उनले भने, ‘कोरोना महामारीलाई मध्य नजर गर्दै अतिथिलाई निमन्त्राणा गरिएको छैन्। भीडभाड नगर्ने प्रयास सकेसम्म गर्छौं । तर,श्रद्धालुलाई हामीले रोक्न सक्दैनौं ।’विगतमा कोरोनाकै कारण मन्दिर समेत बन्द गरेको भन्दै अहिले पनि सतर्कता अपनाउने उनको भनाई छ ।
‘मेला लाग्न नदिने निर्णय’
धनुषाका प्रमुख जिल्ला अधिकारी बन्धु प्रसाद बास्तोलाले मेला लाग्न नदिने निर्णय सुरक्षा समितिको बैठकबाट भएको बताएका छन्। ‘सांस्कृति,मनोरञ्जनात्मक कार्यक्रम, रामहिलोरा (झुला) र बाल खेल गर्नदिन विभिन्न निकायबाट सिफारिस आएको छ’, उनले भने, ‘आइतबार जिल्ला प्रशासन कार्यालय धनुषामा बसेको सुरक्षा समितिको बैठकबाट कुनै पनि प्रकारको भीडभाड गर्न नदिने निर्णय भएको छ ।’ उनका अनुसार विवाहपञ्चमीमा भीडभाड नियन्त्रण गर्नको लागि नेपाल प्रहरी र सशस्त्र प्रहरी परिचालन हुनेछन्। करिव एक हजार प्रहरी परिचालन गर्ने भन्दै अन्य जिल्लाबाट सोमबार प्रहरी टोली जनकपुरधाम आउने प्रजिअ बास्तोलाले बताए । सीमामा थप निगरानी बढाएको भन्दै दुबै देशको सुरक्षा निकायसंग सिमा नाकाको चोरबाटोबाट भइरहेको आवतजावत रोक्न बैठकमा छलफल भएको पनि उनले टुडे एक्सप्रेसलाई जानकारी दिए । आवतजावत रोक्न दुबै देशका सुरक्षा अधिकारीले सीमामा थप कडाई गर्ने उनको भनाई छ ।
तपाईको प्रतिक्रिया !!