टुडे एक्सप्रेस । जनकपुरधाम । प्रदेश २ का सिरहा, धनुषा र महोत्तरीमा भएको दुर्घटनामा एकैदिन चार जनाको मृत्यु भएको छ । मृत्यु हुनेमा एक बालक र तीन युवक छन् । सिरहाको धनगढीमाई नगरपालिका ९ मुसरहर्नियास्थित सडकमा लु. ६२ प. ७६७० नम्बरको मोटरसाइकल आफै अनियन्त्रित भई सोमबार राति दुर्घटना भयो । दुर्घटनापछि मोटरसाइकल चालक सिरहा नगरपालिका १९ का २७ वर्षीय प्रदिप यादवको मृत्यु भएको हो ।
दुर्घटनामा गम्भीर घाइते भएका उनलाई तत्कालै धनगढीस्थित आरके मेडिसिटि लगिएको थियो । तर त्यहाँ उपचार सम्भव नहुँदा नोबेल अस्पताल विराटनगरतर्फ लैजाने क्रममा बाटोमै उनको मृत्यु भएको प्रहरीले जनाएको छ । सोही मोटरसाइकलमा सवार १ जना घाईते भएको र उनको उपचार आरके मेडिसिटिमा भइरहेको छ । उनको अवस्था सामान्य छ । यस्तै सिरहाकै बरियारपट्टी गाउँपालिका ३ स्थित सडकमा रोकी राखेको स.१० प. ४६५९ नम्बरको मोटरसाइकलमा स.४ प. ७१९७ नम्बरको मोटरसाइकल ठक्कर दिएको थियो। ठक्कर दिएका मोटरसाइकल चालक औरही गाउँपालिका ५ का ३० वर्षीय देवकुमार ठाकुरको मृत्यु भएको छ । दुर्घटनामा गम्भिर घाइते उनको नोबेल अस्पताल विराटनगरमा उपचार क्रममा सोमबार मृत्यु भएको प्रहरीले जनाएको छ ।
दुवै मोटरसाइकल प्रहरीले नियन्त्रणमा लिएको छ । यता, धनुषाको मिथिला नगरपालिका ८ बडहरीस्थित सडकमा नम्बर नखुलेको सवारीले ज. ७ प. ५९८६ नम्बरको मोटरसाइकललाई सोमबार राति ठक्कर दिँदा मोटरसाइकल चालक सोही नगरपालिका १ का २५ वर्षीय पंचदेव साहको मृत्यु भएको छ । उनी दुर्घटनामा गम्भीर घाइते भएका थिए । उनलाई उपचारको लागि प्रादेशिक अस्पताल जनकपुरधाम लैजाने क्रममा बाटोमै मृत्यु भएको प्रहरीको भनाई छ । ठक्कर दिने सवारीको खोजी भइरहेको प्रहरीले जनाएको छ ।
यस्तै महोत्तरीको रामगोपालपुर नगरपालिका ९ गोठ बनौली भित्री सडकमा गोरू गाडाले किच्दा सोही ठाउँ माईती घर बस्ने अमृतादेवी यादवको छोरा ३ वर्षीय आयुष यादवको मृत्यु भएको छ । बाटोमा खेलिरहेको अवस्थामा गोरू गाडाले किच्दा गम्भीर घाइते भएका उनको उपचारको लागि जिल्ला अस्पताल जलेश्वरतर्फ लैजाने क्रममा बाटोमै मृत्यु भएको हो। गोरु गाडा र गाडा चलाउने व्यक्तिलाई प्रहरीले नियन्त्रणमा लिएर कारबाही अगाडी बढाएको छ ।
तपाईको प्रतिक्रिया !!